gila nahin jo wo begana-war guzre hain

gilā nahīñ jo vo begāna-vār guzre haiñ

ham aise ahl-e-suḳhan be-shumār guzre haiñ

taras na khaao mirī shiddat-e-tabāhī par

ki umr bhar yahī lail-o-nahār guzre haiñ

tamām-umr rahā ḳhauf-e-nā-pazīrā.ī

jidhar se guzre haiñ dīvāna-vār guzre haiñ

hamīñ se tazkira-e-qahat-e-āshiqāñ tauba

hamīñ to kal tire kūche se yaar guzre haiñ

rahīn-e-vaz-e-buzurgāñ hai apnā dil ya.anī

tire hī shahr meñ tujh se hazār guzre haiñ

hamārā naam bhī rakhiye fasāna-ḳhvānoñ meñ

ki ham bhī apne savāneh-nigār guzre haiñ

ham apne josh-e-tamannā meñ bhuul baiThe the

ki ham se aur bhī ummīd-vār guzre haiñ

is anjuman meñ tujhe kaun pūchhtā 'ālī'

hazār tujh se ġharīb-ud-dayār guzre haiñ

gila nahin jo wo begana-war guzre hain

hum aise ahl-e-suKHan be-shumar guzre hain

taras na khao meri shiddat-e-tabahi par

ki umr bhar yahi lail-o-nahaar guzre hain

tamam-umr raha KHauf-e-na-pazirai

jidhar se guzre hain diwana-war guzre hain

hamin se tazkira-e-qahat-e-ashiqan tauba

hamin to kal tere kuche se yar guzre hain

rahin-e-waz-e-buzurgan hai apna dil yani

tere hi shahr mein tujh se hazar guzre hain

hamara nam bhi rakhiye fasana-KHwanon mein

ki hum bhi apne sawaneh-nigar guzre hain

hum apne josh-e-tamanna mein bhul baiThe the

ki hum se aur bhi ummid-war guzre hain

is anjuman mein tujhe kaun puchhta 'ali'

hazar tujh se gharib-ud-dayar guzre hain