go aaj andhera hai kal hoga charaghan bhi

go aaj añdherā hai kal hogā charāġhāñ bhī

taḳhrīb meñ shāmil hai ta.amīr kā sāmāñ bhī

maz.har tire jalvoñ ke māman mirī vahshat ke

kohsār-o-gulistāñ bhī sahrā-o-bayābāñ bhī

dam toḌtī maujeñ kyā sāhil kā pata deñgī

Thahrī huī kashtī hai ḳhāmosh hai tūfāñ bhī

majbūr-e-ġham-e-duniyā dil se to koī pūchhe

ehsās kī rag meñ hai ḳhār-e-ġham-e-jānāñ bhī

buġhz-o-hasad-o-nafrat nākāmī-o-mahrūmī

insānoñ kī bastī meñ kyā hai koī insāñ bhī

dīvāna-e-ulfat ko dar se tire miltā hai

har zaḳhm kā marham bhī har dard kā darmāñ bhī

letī hai jab añgḌā.ī bedār kiran koī

hotā hai 'ziyā' ḳhud hī raqsāñ bhī ġhazal-ḳhvāñ bhī

go aaj andhera hai kal hoga charaghan bhi

taKHrib mein shamil hai tamir ka saman bhi

mazhar tere jalwon ke maman meri wahshat ke

kohsar-o-gulistan bhi sahra-o-bayaban bhi

dam toDti maujen kya sahil ka pata dengi

Thahri hui kashti hai KHamosh hai tufan bhi

majbur-e-gham-e-duniya dil se to koi puchhe

ehsas ki rag mein hai KHar-e-gham-e-jaanan bhi

bughz-o-hasad-o-nafrat nakaami-o-mahrumi

insanon ki basti mein kya hai koi insan bhi

diwana-e-ulfat ko dar se tere milta hai

har zaKHm ka marham bhi har dard ka darman bhi

leti hai jab angDai bedar kiran koi

hota hai 'ziya' KHud hi raqsan bhi ghazal-KHwan bhi