go tujhse kabhi sarf-e-nazar hum nahin karte

go tujh se kabhī sarf-e-nazar ham nahīñ karte

tere liye duniyā se mafar ham nahīñ karte

hālāñki asar meñ tire rahte haiñ shab-o-roz

har kaam tire zer-e-asar ham nahīñ karte

vo shahr meñ yuuñ hī kahīñ mil jaatā hai aksar

milne ke liye us se safar ham nahīñ karte

uTh jaa.e kam-o-besh ma'ānī kā takalluf

kyoñ apnī ḳhamoshī ko hunar ham nahīñ karte

tai kaise kareñ vādī-e-jāñ ke ye marāhil

ab jism kī manzil ko bhī sar ham nahīñ karte

ham jiite haiñ bas apnī hī marzī ke mutābiq

auroñ kī tarah 'umr basar ham nahīñ karte

'najmī' ham use qibla-e-jāñ kahte haiñ lekin

afsos ki ruḳh apnā udhar ham nahīñ karte

go tujh se kabhi sarf-e-nazar hum nahin karte

tere liye duniya se mafar hum nahin karte

haalanki asar mein tere rahte hain shab-o-roz

har kaam tere zer-e-asar hum nahin karte

wo shahr mein yun hi kahin mil jata hai aksar

milne ke liye us se safar hum nahin karte

uTh jae kam-o-besh ma'ani ka takalluf

kyon apni KHamoshi ko hunar hum nahin karte

tai kaise karen wadi-e-jaan ke ye marahil

ab jism ki manzil ko bhi sar hum nahin karte

hum jite hain bas apni hi marzi ke mutabiq

auron ki tarah 'umr basar hum nahin karte

'najmi' hum use qibla-e-jaan kahte hain lekin

afsos ki ruKH apna udhar hum nahin karte