ghubar hone lagin zindagi mein sab chizen

ġhubār hone lagīñ zindagī meñ sab chīzeñ

ye merā vahm hai yā vāqa'ī meñ sab chīzeñ

kisī bhī chiiz se is meñ kamī nahīñ aatī

izāfa kartī haiñ terī kamī meñ sab chīzeñ

ye inkishāf huā hai añdherā baḌhne se

dikhā.ī detī nahīñ raushnī meñ sab chīzeñ

nikal rahā thā maiñ ghar se to kal nazar aa.iiñ

ġhurūb hotī huī us galī meñ sab chīzeñ

yahī ġhiyāb meñ mere kalām kartī haiñ

jo chup haiñ ab mirī maujūdgī meñ sab chīzeñ

vo vaqt biit chukā ab 'ajīb lagtī haiñ

pasand aatī rahīñ jo ḳhushī meñ sab chīzeñ

maiñ kis tarah se tumhārī sadā pe ruk jā.ūñ

ki chal rahī haiñ mirī hamrahī meñ sab chīzeñ

mire badalne se ye inqalāb aayā hai

badal ga.ī haiñ ghaḌī do ghaḌī meñ sab chīzeñ

magar ye shahr hai 'kāshif-husain' dasht nahīñ

ravā sahī miyāñ dīvāngī meñ sab chīzeñ

ghubar hone lagin zindagi mein sab chizen

ye mera wahm hai ya waqa'i mein sab chizen

kisi bhi chiz se is mein kami nahin aati

izafa karti hain teri kami mein sab chizen

ye inkishaf hua hai andhera baDhne se

dikhai deti nahin raushni mein sab chizen

nikal raha tha main ghar se to kal nazar aain

ghurub hoti hui us gali mein sab chizen

yahi ghiyab mein mere kalam karti hain

jo chup hain ab meri maujudgi mein sab chizen

wo waqt bit chuka ab 'ajib lagti hain

pasand aati rahin jo KHushi mein sab chizen

main kis tarah se tumhaari sada pe ruk jaun

ki chal rahi hain meri hamrahi mein sab chizen

mere badalne se ye inqalab aaya hai

badal gai hain ghaDi do ghaDi mein sab chizen

magar ye shahr hai 'kashif-husain' dasht nahin

rawa sahi miyan diwangi mein sab chizen