گل بدن گل پیرہن روح چمن تم ہی تو ہو

گل بدن گل پیرہن روح چمن تم ہی تو ہو

جان من غنچہ دہن شیریں سخن تم ہی تو ہو

گلشن ہستی کی رعنائی تمہارے دم سے ہے

نرگس و نسریں گلاب و یاسمن تم ہی تو ہو

میری عزت میری ذلت سب تمہارے ہاتھ ہے

میں برہنہ جسم میرا پیرہن تم ہی تو ہو

جس کو پانے کے لئے اہل خرد ترسا کئے

میرا وہ سرمایہ وہ دیوانہ پن تم ہی تو ہو

کوئی سمجھے یا نہ سمجھے میں سمجھتا ہوں ضرور

زندگی تم ہی تو ہو دار و رسن تم ہی تو ہو

ساری دنیا کی بہاریں جس کے چہرے پر نثار

جس پہ قرباں دو جہاں کا بانکپن تم ہی تو ہو

میں تمہارے عشق میں کافر سے مومن بن گیا

میری نظروں میں ہدایت کی کرن تم ہی تو ہو

کر دیا جس نے مجھے عہد وفا سے آشنا

جس نے بخشی پیار کی میٹھی چبھن تم ہی تو ہو

رات کی تاریکیوں کو جس نے بخشی روشنی

چاند تاروں کی وہ دل کش انجمن تم ہی تو ہو

بھول جاتا ہوں میں جس کو دیکھ کر ہر غم شفیعؔ

میرے ارمانوں کا وہ زریں گگن تم ہی تو ہو