gulshan mein shor-e-zagh-o-zaghan kuchh na puchhiye

gulshan meñ shor-e-zāġh-o-zaġhan kuchh na pūchhiye

kyā kuchh hai bulbuloñ kī kuḌhan kuchh na pūchhiye

kunj-e-qafas meñ hāl-e-chaman kuchh na pūchhiye

afsāna-e-nishāt-e-kuhan kuchh na pūchhiye

kis kis tarah tabāh huā apnā āshiyāñ

tūfān-e-barq-o-bād-e-chaman kuchh na pūchhiye

sayyād se nibāh ho gul-chīñ se rasm-o-rāh

ho jab ye bāġhbāñ kā chalan kuchh na pūchhiye

shabnam zarā girī bhī to bas chhan se uḌ ga.ī

gul yuuñ damak uThe ki patan kuchh na pūchhiye

abr-e-bahār aur girīñ us se bijliyāñ

hālāt-e-iltihāb-e-chaman kuchh na pūchhiye

achchhe rahe jo kunj-e-qafas meñ simaT rahe

ḳhatrāt-e-sahn-e-bāġh-o-chaman kuchh na pūchhiye

kuchh ghaT chalī thī mere shab-e-ġham kī tīrgī

phir chāñd ko lagā to gahan kuchh na pūchhiye

barsoñ sañvārī ham ne jo uljhī kisī kī zulf

aaj us meñ paḌ ga.ī jo shikan kuchh na pūchhiye

vo pūchhte haiñ mujh se mirā mudda’ā-e-‘ishq

ab hāl-e-iztirāb-e-suḳhan kuchh na pūchhiye

talḳhāb apne haq meñ mai-e-nau kā ghūñT ghūñT

phir lazzat-e-sharāb-e-kuhan kuchh na pūchhiye

hikmat kabhī thī hikmat-e-islāh-e-zindagī

jab falsafa ho makr kā fan kuchh na pūchhiye

insāniyat ko bhuul ke insāñ huā hai kyā

shaitān kyoñ hai qahqaha-zan kuchh na pūchhiye

vo be-niyāz-e-fikr-o-talab un ko kyā talab

maiñ shauq-o-ārzū hama-tan kuchh na pūchhiye

har lab pe koī nā’ra-e-mansūr josh-zan

tajdīd-e-zauq-e-dār-o-rasan kuchh na pūchhiye

ye dekhiye ki fitrat-e-haq kī sadā hai kyā

'ārif' kā mudda’ā-e-suḳhan kuchh na pūchhiye

gulshan mein shor-e-zagh-o-zaghan kuchh na puchhiye

kya kuchh hai bulbulon ki kuDhan kuchh na puchhiye

kunj-e-qafas mein haal-e-chaman kuchh na puchhiye

afsana-e-nishat-e-kuhan kuchh na puchhiye

kis kis tarah tabah hua apna aashiyan

tufan-e-barq-o-baad-e-chaman kuchh na puchhiye

sayyaad se nibah ho gul-chin se rasm-o-rah

ho jab ye baghban ka chalan kuchh na puchhiye

shabnam zara giri bhi to bas chhan se uD gai

gul yun damak uThe ki patan kuchh na puchhiye

abr-e-bahaar aur girin us se bijliyan

haalat-e-iltihab-e-chaman kuchh na puchhiye

achchhe rahe jo kunj-e-qafas mein simaT rahe

KHatraat-e-sahn-e-bagh-o-chaman kuchh na puchhiye

kuchh ghaT chali thi mere shab-e-gham ki tirgi

phir chand ko laga to gahan kuchh na puchhiye

barson sanwari hum ne jo uljhi kisi ki zulf

aaj us mein paD gai jo shikan kuchh na puchhiye

wo puchhte hain mujh se mera mudda’a-e-‘ishq

ab haal-e-iztirab-e-suKHan kuchh na puchhiye

talKHab apne haq mein mai-e-nau ka ghunT ghunT

phir lazzat-e-sharab-e-kuhan kuchh na puchhiye

hikmat kabhi thi hikmat-e-islah-e-zindagi

jab falsafa ho makr ka fan kuchh na puchhiye

insaniyat ko bhul ke insan hua hai kya

shaitan kyon hai qahqaha-zan kuchh na puchhiye

wo be-niyaz-e-fikr-o-talab un ko kya talab

main shauq-o-arzu hama-tan kuchh na puchhiye

har lab pe koi na’ra-e-mansur josh-zan

tajdid-e-zauq-e-dar-o-rasan kuchh na puchhiye

ye dekhiye ki fitrat-e-haq ki sada hai kya

'arif' ka mudda’a-e-suKHan kuchh na puchhiye