گلشن میں شور زاغ و زغن کچھ نہ پوچھئے

گلشن میں شور زاغ و زغن کچھ نہ پوچھئے

کیا کچھ ہے بلبلوں کی کڑھن کچھ نہ پوچھئے

کنج قفس میں حال چمن کچھ نہ پوچھئے

افسانۂ نشاط کہن کچھ نہ پوچھئے

کس کس طرح تباہ ہوا اپنا آشیاں

طوفان برق و باد چمن کچھ نہ پوچھئے

صیاد سے نباہ ہو گل چیں سے رسم و راہ

ہو جب یہ باغباں کا چلن کچھ نہ پوچھئے

شبنم ذرا گری بھی تو بس چھن سے اڑ گئی

گل یوں دمک اٹھے کہ پتن کچھ نہ پوچھئے

ابر بہار اور گریں اس سے بجلیاں

حالات التہاب چمن کچھ نہ پوچھئے

اچھے رہے جو کنج قفس میں سمٹ رہے

خطرات صحن باغ و چمن کچھ نہ پوچھئے

کچھ گھٹ چلی تھی میرے شب غم کی تیرگی

پھر چاند کو لگا تو گہن کچھ نہ پوچھئے

برسوں سنواری ہم نے جو الجھی کسی کی زلف

آج اس میں پڑ گئی جو شکن کچھ نہ پوچھئے

وہ پوچھتے ہیں مجھ سے مرا مدعائے عشق

اب حال اضطراب سخن کچھ نہ پوچھئے

تلخاب اپنے حق میں مے نو کا گھونٹ گھونٹ

پھر لذت شراب کہن کچھ نہ پوچھئے

حکمت کبھی تھی حکمت اصلاح زندگی

جب فلسفہ ہو مکر کا فن کچھ نہ پوچھئے

انسانیت کو بھول کے انساں ہوا ہے کیا

شیطان کیوں ہے قہقہہ زن کچھ نہ پوچھئے

وہ بے نیاز فکر و طلب ان کو کیا طلب

میں شوق و آرزو ہمہ تن کچھ نہ پوچھئے

ہر لب پہ کوئی نعرۂ منصور جوش زن

تجدید ذوق دار و رسن کچھ نہ پوچھئے

یہ دیکھیے کہ فطرت حق کی صدا ہے کیا

عارفؔ کا مدعائے سخن کچھ نہ پوچھئے