gulshan se jab bahaar ka mausam guzar gaya

gulshan se jab bahār kā mausam guzar gayā

maiñ bhī ġhubār ban ke havā meñ bikhar gayā

dariyā ke biich se to vo hañs kar guzar gayā

sāhil ke paas aa ke vo tūfāñ se Dar gayā

Thokar lagī kuchh aisī vo gir kar na uTh sakā

saarā nasha ġhurūr kā sar se utar gayā

un ke baġhair mere muqaddar meñ kuchh na thā

vo aa ga.e to merā muqaddar sañvar gayā

vaise kisī ne mujh ko nikharne nahīñ diyā

ḳhud ko tarāsh kar maiñ 'azīzo nikhar gayā

jab tak yahāñ rahā vo koī pūchhtā na thā

sab pūchhte haiñ us ko ki ab vo kidhar gayā

sach bolne hī vaalā thā ik shaḳhs ai 'ziyā'

yak-laḳht us kī piiTh meñ ḳhanjar utar gayā

gulshan se jab bahaar ka mausam guzar gaya

main bhi ghubar ban ke hawa mein bikhar gaya

dariya ke bich se to wo hans kar guzar gaya

sahil ke pas aa ke wo tufan se Dar gaya

Thokar lagi kuchh aisi wo gir kar na uTh saka

sara nasha ghurur ka sar se utar gaya

un ke baghair mere muqaddar mein kuchh na tha

wo aa gae to mera muqaddar sanwar gaya

waise kisi ne mujh ko nikharne nahin diya

KHud ko tarash kar main 'azizo nikhar gaya

jab tak yahan raha wo koi puchhta na tha

sab puchhte hain us ko ki ab wo kidhar gaya

sach bolne hi wala tha ek shaKHs ai 'ziya'

yak-laKHt us ki piTh mein KHanjar utar gaya