gulzar khila Dala jis rah se hum guzre

gulzār khilā Daalā jis raah se ham guzre

chunte hue ḳhāroñ ko zaḳhmoñ kī qasam guzre

majbūr-e-mohabbat kā tohfa haiñ ye do aañsū

bach bach ke zarā in se tūfān-e-sitam guzre

bā-hosh na rah paa.e behosh na ho paa.e

aise bhī ka.ī aalam is dil pe baham guzre

dekhā ġham-e-daurāñ ne hairat kī nigāhoñ se

kāñToñ-bharī rāhoñ se hañs hañs ke jo ham guzre

dekhā na kabhī us ne ham sāmne se aksar

āñkhoñ meñ liye apnī rūdād-e-alam guzre

mas.hūr huī duniyā maḳhmūr huā aalam

ḳhvāboñ ke jazīre se ho kar jo sanam guzre

gulzar khila Dala jis rah se hum guzre

chunte hue KHaron ko zaKHmon ki qasam guzre

majbur-e-mohabbat ka tohfa hain ye do aansu

bach bach ke zara in se tufan-e-sitam guzre

ba-hosh na rah pae behosh na ho pae

aise bhi kai aalam is dil pe baham guzre

dekha gham-e-dauran ne hairat ki nigahon se

kanTon-bhari rahon se hans hans ke jo hum guzre

dekha na kabhi us ne hum samne se aksar

aankhon mein liye apni rudad-e-alam guzre

mashur hui duniya maKHmur hua aalam

KHwabon ke jazire se ho kar jo sanam guzre