guman sa hai dil-e-KHush-guman ke bich kahin

gumān sā hai dil-e-ḳhush-gumāñ ke biich kahīñ

khulā hai dar sā koī āsmāñ ke biich kahīñ

dharī hai tāq-e-abad meñ kisī charāġh kī lau

khilā huā hai koī gul ḳhizāñ ke biich kahīñ

khule nahīñ haiñ abhī hairatoñ ke baab ka.ī

bhare haiñ bhed mirī dāstāñ ke biich kahīñ

vo ḳhvāb aur kināroñ ke log dekheñge

bahe the jo mire sail-e-ravāñ ke biich kahīñ

paḌā huā hai mirā aa.ina damaktā huā

zamīñ ke biich kahīñ yā zamāñ ke biich kahīñ

mileñge agle zamānoñ meñ ḳhadd-o-ḳhāl mire

chhupā huā huuñ maiñ harf-o-bayāñ ke biich kahīñ

azal se ḳhaak huuñ aur ḳhaak ko zavāl nahīñ

mudām rahnā hai sayyārgāñ ke biich kahīñ

mirā sitāra-e-zau-rez us taraf hī na ho

talāsh karnā hai ā.indagāñ ke biich kahīñ

guman sa hai dil-e-KHush-guman ke bich kahin

khula hai dar sa koi aasman ke bich kahin

dhari hai taq-e-abad mein kisi charagh ki lau

khila hua hai koi gul KHizan ke bich kahin

khule nahin hain abhi hairaton ke bab kai

bhare hain bhed meri dastan ke bich kahin

wo KHwab aur kinaron ke log dekhenge

bahe the jo mere sail-e-rawan ke bich kahin

paDa hua hai mera aaina damakta hua

zamin ke bich kahin ya zaman ke bich kahin

milenge agle zamanon mein KHadd-o-KHal mere

chhupa hua hun main harf-o-bayan ke bich kahin

azal se KHak hun aur KHak ko zawal nahin

mudam rahna hai sayyargan ke bich kahin

mera sitara-e-zau-rez us taraf hi na ho

talash karna hai aaindagan ke bich kahin