gumrahi ka meri saman hua jata hai

gumrahī kā mirī sāmān huā jaatā hai

rāsta ziist kā āsān huā jaatā hai

ik taraf ruuh ki parvāz ko jaise tayyār

ik taraf jism ki be-jān huā jaatā hai

dasht-e-ġhurbat hai ki ābād hamāre dam se

ghar kā āñgan hai ki vīrān huā jaatā hai

kyuuñ na phir dhuup bhī ban jaa.e ghaTā jab ham par

aap kā sāya-e-mizhgān huā jaatā hai

kah diyā aap ne kyā kaan meñ chupke se ise

dil meñ barpā mire haijān huā jaatā hai

aap kī merī hī ġhazloñ kī haiñ katran saarī

jin se vo sāhab-e-dīvān huā jaatā hai

dī hai chupke se 'obaid' us ne laboñ par dastak

shor barpā tah-e-shiryān huā jaatā hai

gumrahi ka meri saman hua jata hai

rasta zist ka aasan hua jata hai

ek taraf ruh ki parwaz ko jaise tayyar

ek taraf jism ki be-jaan hua jata hai

dasht-e-ghurbat hai ki aabaad hamare dam se

ghar ka aangan hai ki viran hua jata hai

kyun na phir dhup bhi ban jae ghaTa jab hum par

aap ka saya-e-mizhgan hua jata hai

kah diya aap ne kya kan mein chupke se ise

dil mein barpa mere haijaan hua jata hai

aap ki meri hi ghazlon ki hain katran sari

jin se wo sahab-e-diwan hua jata hai

di hai chupke se 'obaid' us ne labon par dastak

shor barpa tah-e-shiryan hua jata hai