gunah-e-ishq mein is baat kei taskin hoti hai

gunāh-e-ishq meñ is baat keī taskīn hotī hai

huā ho jurm gahrā to sazā sañgīn hotī hai

khule rakhte ho darvāze darīche bārhā tum kyoñ

suno duniyā tamāshoñ keī baḌī shauqīn hotī hai

safar meñ dhuup hai to kyā udāsī oḌh loge tum

mile saa.e jo the un kī baḌī tauhīn hotī hai

zarā ro lo kahīñ aañsū agar ye suukh jaa.eñ to

nahīñ haiñ zaḳhm bharte aur zabāñ namkīn hotī hai

tumhārā lauT ke aanā hamārī ḳhvāhish-e-bejā

magar bharte haiñ jab bhī dam dam-e-āmīn hotī hai

sahārā ban nahīñ paate bhale ḳhud-ġharz kuchh bachche

musībat ho magar in pe to maañ ġhamgīn hotī hai

siyāsat aur daulat jab siyāhī sokh lete haiñ

kisī ke ḳhuun se tasvīr tab rañgīn hotī hai

gunah-e-ishq mein is baat kei taskin hoti hai

hua ho jurm gahra to saza sangin hoti hai

khule rakhte ho darwaze dariche barha tum kyon

suno duniya tamashon kei baDi shauqin hoti hai

safar mein dhup hai to kya udasi oDh loge tum

mile sae jo the un ki baDi tauhin hoti hai

zara ro lo kahin aansu agar ye sukh jaen to

nahin hain zaKHm bharte aur zaban namkin hoti hai

tumhaara lauT ke aana hamari KHwahish-e-beja

magar bharte hain jab bhi dam dam-e-amin hoti hai

sahaara ban nahin pate bhale KHud-gharz kuchh bachche

musibat ho magar in pe to man ghamgin hoti hai

siyasat aur daulat jab siyahi sokh lete hain

kisi ke KHun se taswir tab rangin hoti hai