غنچۂ وصل سر شام کھلا دے آ کر

غنچۂ وصل سر شام کھلا دے آ کر

ہجر کی رت میں کوئی مژدہ سنا دے آ کر

رقص جاری ہے لہو کا مری شریانوں میں

بربط روح میں آواز ملا دے آ کر

لوگ مر جاتے ہیں بے چارہ گری کے ہوتے

دم عیسیٰ بھی نہیں اب کہ جلا دے آ کر

اسی امید پہ سب اہل کرم بیٹھے ہیں

کوئی سائل کی طرح آئے صدا دے آ کر

مسکرا کر مری غزلوں کو پڑھا کرتا ہے

شعر اپنے بھی کبھی یار سنا دے آ کر

ناؤ کاغذ کی لئے بیٹھا ہوں جانے کب سے

آ ادھر سیل رواں اس کو بہا دے آ کر