guzar gai hai mujhe reg-zar karti hui

guzar ga.ī hai mujhe reg-zār kartī huī

vo ek machhlī samundar shikār kartī huī

na jaane kitne bhañvar ko rulā ke aa.e hai

ye merī kashtī-e-jāñ ḳhud ko paar kartī huī

vo ek sā.at-e-ma.asūm dil kī parvarda

mukar ga.ī hai magar e'tibār kartī huī

junūñ kī āḳhirī larzīda muzmahil sī raat

jhapak ga.ī hai zarā intizār kartī huī

ye kaisī ḳhvāhish-e-nā-dīd hai dorāhe par

sahm ga.ī hai abhī mujh pe vaar kartī huī

lipaT ke so ga.ī āḳhir sham-e-firāq ke saath

shab-e-siyāh sitāre shumār kartī huī

safar meñ kaisī harārat qarīb thī 'ḳhurshīd'

utar ga.ī hai mujhe dhār-dār kartī huī

guzar gai hai mujhe reg-zar karti hui

wo ek machhli samundar shikar karti hui

na jaane kitne bhanwar ko rula ke aae hai

ye meri kashti-e-jaan KHud ko par karti hui

wo ek saat-e-masum dil ki parwarda

mukar gai hai magar e'tibar karti hui

junun ki aaKHiri larzida muzmahil si raat

jhapak gai hai zara intizar karti hui

ye kaisi KHwahish-e-na-did hai dorahe par

sahm gai hai abhi mujh pe war karti hui

lipaT ke so gai aaKHir sham-e-firaq ke sath

shab-e-siyah sitare shumar karti hui

safar mein kaisi hararat qarib thi 'KHurshid'

utar gai hai mujhe dhaar-dar karti hui