guzar kar aadmi rah-e-musibat se sanwarta hai

guzar kar aadmī rāh-e-musībat se sañvartā hai

qamar kā nuur shab kī zulmatoñ meñ hī nikhartā hai

ba-juz dard-e-hayāt-e-ġham nahīñ miltā kahīñ kuchh bhī

bashar duniyā-e-fānī meñ jahāñ se bhī guzartā hai

guloñ kī pattiyāñ jaise guloñ se ruuTh jaatī haiñ

dam-e-tanhā.ī-e-ġham kuchh mirā dil yuuñ bikhartā hai

ba-sūrat qatra-e-shabnam huuñ maiñ ḳhār-e-gulistāñ par

mirā dil zahmat-e-mehr-e-daraḳhshāñ se bhī Dartā hai

ye dekhā hai nahīñ be-faiz aamad abr-e-naisāñ kī

koī anjām hotā hai bashar jo kuchh bhī kartā hai

farishtoñ kā guzar jin manziloñ se ġhair-mumkin hai

bashar kī azmateñ dekho vahāñ se bhī guzartā hai

nikohish nāḳhun-e-nādāñ pe qaabū pā hī jaatī hai

baḌā parhez karte haiñ kahīñ tab zaḳhm bhartā hai

sambhal ai firqa-e-ushshāq ab phir imtihāñ hogā

sar-e-chilman kisī kāfir kā phir gesū sañvartā hai

ulajhte haiñ tire kūche meñ jo murġh-e-chaman ke pair

dam-e-parvāz gulshan se kisī kā dil bhī bhartā hai

fanā kartā hai pahle zindagī kī har tamannā ko

kahīñ tab jā ke insāñ pastī-e-ġham se ubhartā hai

isī baa.is vufūr-e-ġham meñ aksar 'nāz' hañste haiñ

musībat aur baḌhtī hai jo ġham se jitnā Dartā hai

guzar kar aadmi rah-e-musibat se sanwarta hai

qamar ka nur shab ki zulmaton mein hi nikharta hai

ba-juz dard-e-hayat-e-gham nahin milta kahin kuchh bhi

bashar duniya-e-fani mein jahan se bhi guzarta hai

gulon ki pattiyan jaise gulon se ruTh jati hain

dam-e-tanhai-e-gham kuchh mera dil yun bikharta hai

ba-surat qatra-e-shabnam hun main KHar-e-gulistan par

mera dil zahmat-e-mehr-e-daraKHshan se bhi Darta hai

ye dekha hai nahin be-faiz aamad abr-e-naisan ki

koi anjam hota hai bashar jo kuchh bhi karta hai

farishton ka guzar jin manzilon se ghair-mumkin hai

bashar ki azmaten dekho wahan se bhi guzarta hai

nikohish naKHun-e-nadan pe qabu pa hi jati hai

baDa parhez karte hain kahin tab zaKHm bharta hai

sambhal ai firqa-e-ushshaq ab phir imtihan hoga

sar-e-chilman kisi kafir ka phir gesu sanwarta hai

ulajhte hain tere kuche mein jo murgh-e-chaman ke pair

dam-e-parwaz gulshan se kisi ka dil bhi bharta hai

fana karta hai pahle zindagi ki har tamanna ko

kahin tab ja ke insan pasti-e-gham se ubharta hai

isi bais wufur-e-gham mein aksar 'naz' hanste hain

musibat aur baDhti hai jo gham se jitna Darta hai