guzishta se koi lamha bhi paiwasta nahin nikla

guzishta se koī lamha bhī paivasta nahīñ niklā

hamārā haal kyoñ maazī se vābasta nahīñ niklā

hunar-nā-āshnā Thahrī hamārī sho'bada-bāzī

kisī rūmāl ke parde se guldasta nahīñ niklā

'adū se jang karne pe hai saarā shahr āmāda

koī ab tak magar ghar se kamar-basta nahīñ niklā

tumhārī guftugū saarī mujhe lagtī hai masnū'ī

koī jumla tumhāre muñh se barjasta nahīñ niklā

yahāñ do-chār din merā Thaharne kā irāda thā

magar is shahr se bāhar koī rasta nahīñ niklā

ka.ī andāz se ye dil ḳharīdā aur bechā hai

magar saudā mohabbat meñ kabhī sastā nahīñ niklā

na-jāne mar gayā is shahr kā har shaḳhs kyoñ 'āsim'

ki andar se to koī jism bhī ḳhasta nahīñ niklā

guzishta se koi lamha bhi paiwasta nahin nikla

hamara haal kyon mazi se wabasta nahin nikla

hunar-na-ashna Thahri hamari sho'bada-bazi

kisi rumal ke parde se guldasta nahin nikla

'adu se jang karne pe hai sara shahr aamada

koi ab tak magar ghar se kamar-basta nahin nikla

tumhaari guftugu sari mujhe lagti hai masnu'i

koi jumla tumhaare munh se barjasta nahin nikla

yahan do-chaar din mera Thaharne ka irada tha

magar is shahr se bahar koi rasta nahin nikla

kai andaz se ye dil KHarida aur becha hai

magar sauda mohabbat mein kabhi sasta nahin nikla

na-jaane mar gaya is shahr ka har shaKHs kyon 'asim'

ki andar se to koi jism bhi KHasta nahin nikla