گزشتہ سے کوئی لمحہ بھی پیوستہ نہیں نکلا

گزشتہ سے کوئی لمحہ بھی پیوستہ نہیں نکلا

ہمارا حال کیوں ماضی سے وابستہ نہیں نکلا

ہنر ناآشنا ٹھہری ہماری شعبدہ بازی

کسی رومال کے پردہ سے گلدستہ نہیں نکلا

عدو سے جنگ کرنے پہ ہے سارا شہر آمادہ

کوئی اب تک مگر گھر سے کمر بستہ نہیں نکلا

تمہاری گفتگو ساری مجھے لگتی ہے مصنوعی

کوئی جملہ تمہارے منہ سے برجستہ نہیں نکلا

یہاں دو چار دن میرا ٹھہرنے کا ارادہ تھا

مگر اس شہر سے باہر کوئی رستہ نہیں نکلا

کئی انداز سے یہ دل خریدا اور بیچا ہے

مگر سودا محبت میں کبھی سستا نہیں نکلا

نہ جانے مر گیا اس شہر کا ہر شخص کیوں عاصمؔ

کہ اندر سے تو کوئی جسم بھی خستہ نہیں نکلا