حال اچھا ہے نہ ہی ہوش ٹھکانے سے ہے

حال اچھا ہے نہ ہی ہوش ٹھکانے سے ہے

بے قراری کا یہ عالم تو زمانہ سے ہے

ایک مدت سے میسر نہیں گھر کو رونق

اس پہ پرہیز تمہیں ہنسنے ہنسانے سے ہے

ناخوشی بے بسی ہو جائیں نمایاں صاحب

فائدہ دشمنوں کو حال چھپانے سے ہے

چل ذرا اپنی روایت سے الگ رستے پر

اب کے خطرہ بھی تو خطرہ نہ اٹھانے سے ہے

جیسا ہے ویسا رہے گا یہ جہاں میرے دوست

اس کو مطلب نہ ترے آنے نہ جانے سے ہے

لے گیا لوٹ کے جو ملک کی دولت یارو

وہ کوئی چور نہیں راج گھرانے سے ہے