haal-e-supurdagi mein bhi dil ko malal sa raha

hāl-e-supurdagī meñ bhī dil ko malāl sā rahā

tere ḳhayāl meñ bhī kuchh apnā ḳhayāl sā rahā

mujh ko to kuchh ġharaz na thī tere javāb se magar

is dil-e-be-imān ke jī meñ savāl sā rahā

tū ne mujhe chhuā thā kyā jaane vo mo'jiza thā kyā

hijr kī sā'atoñ meñ bhī mujh ko visāl sā rahā

kitnī masāfatoñ ke baa'd tai huī thī vo rāh-e-yād

itne qarīb aa ke bhī shīshe meñ baal sā rahā

vahm-o-gumāñ yaqīn-o-haq dil ke maqām the sabhī

haal jo dil kā thā vahī apnā bhī haal sā rahā

raas na aayā hasb-e-hāl ham ko to terā bhī visāl

kaisā bhī thā jahāñ kā haal jī ko vabāl sā rahā

haal-e-supurdagi mein bhi dil ko malal sa raha

tere KHayal mein bhi kuchh apna KHayal sa raha

mujh ko to kuchh gharaz na thi tere jawab se magar

is dil-e-be-iman ke ji mein sawal sa raha

tu ne mujhe chhua tha kya jaane wo mo'jiza tha kya

hijr ki sa'aton mein bhi mujh ko visal sa raha

kitni masafaton ke ba'd tai hui thi wo rah-e-yaad

itne qarib aa ke bhi shishe mein baal sa raha

wahm-o-guman yaqin-o-haq dil ke maqam the sabhi

haal jo dil ka tha wahi apna bhi haal sa raha

ras na aaya hasb-e-haal hum ko to tera bhi visal

kaisa bhi tha jahan ka haal ji ko wabaal sa raha