حال سپردگی میں بھی دل کو ملال سا رہا

حال سپردگی میں بھی دل کو ملال سا رہا

تیرے خیال میں بھی کچھ اپنا خیال سا رہا

مجھ کو تو کچھ غرض نہ تھی تیرے جواب سے مگر

اس دل بے ایمان کے جی میں سوال سا رہا

تو نے مجھے چھوا تھا کیا جانے وہ معجزہ تھا کیا

ہجر کی ساعتوں میں بھی مجھ کو وصال سا رہا

کتنی مسافتوں کے بعد طے ہوئی تھی وہ راہ یاد

اتنے قریب آ کے بھی شیشہ میں بال سا رہا

وہم و گماں یقین و حق دل کے مقام تھے سبھی

حال جو دل کا تھا وہی اپنا بھی حال سا رہا

راس نہ آیا حسب حال ہم کو تو تیرا بھی وصال

کیسا بھی تھا جہاں کا حال جی کو وبال سا رہا