haalanki bhare ghar mein to ab koi nahin hai

hālāñki bhare ghar meñ to ab koī nahīñ hai

parchhā.īñ koī Dar ke magar ab bhī vahīñ hai

ye nashsha-e-ġham mujh ko sañbhalne nahīñ detā

rakhtā huuñ kahīñ paañv to paḌ jaatā kahīñ hai

haath apne lapakte haiñ ki chhū leñ mah-o-anjum

paaoñ meñ magar sūrat-e-zanjīr zamīñ hai

paḌh saktā agar ho to paḌhe saarā zamāna

tū jis pe hai tahrīr vo merī hī jabīñ hai

ye dasht-o-daman kuchh bhī nahīñ haiñ mire aage

phailā huā sahrā bhī mire zer-e-nagīñ hai

lagtā hai 'nafīs' ab ki badal jā.egā mausam

ab shaam ke chehre pe udāsī bhī nahīñ hai

haalanki bhare ghar mein to ab koi nahin hai

parchhain koi Dar ke magar ab bhi wahin hai

ye nashsha-e-gham mujh ko sanbhalne nahin deta

rakhta hun kahin panw to paD jata kahin hai

hath apne lapakte hain ki chhu len mah-o-anjum

paon mein magar surat-e-zanjir zamin hai

paDh sakta agar ho to paDhe sara zamana

tu jis pe hai tahrir wo meri hi jabin hai

ye dasht-o-daman kuchh bhi nahin hain mere aage

phaila hua sahra bhi mere zer-e-nagin hai

lagta hai 'nafis' ab ki badal jaega mausam

ab sham ke chehre pe udasi bhi nahin hai