haalanki ye bar-waqt kahani nahin likhti

hālāñki ye bar-vaqt kahānī nahīñ likhtī

tārīḳh magar ḳhuun ko paanī nahīñ likhtī

ik aisī 'adālat meñ hai darḳhvāst hamārī

afsos jo zaanī ko bhī zaanī nahīñ likhtī

maiñ is liye zinda huuñ ki maiñ bol rahā huuñ

duniyā kisī gūñge kī kahānī nahīñ likhtī

har 'umr kā ehsās badal detā hai kapḌe

rūdād laḌak-pan kī javānī nahīñ likhtī

maiñ bhī kabhī zaḳhmoñ kī numā.ish nahīñ kartā

vo bhī kabhī maazī kī kahānī nahīñ likhtī

ghar ko kabhī malba nahīñ kahtī hai mohabbat

vo apnī havelī ko purānī nahīñ likhtī

nuqsān 'vasīm' is meñ hai duniyā kā hī lekin

phir bhī vo mirī talḳh-bayānī nahīñ likhtī

haalanki ye bar-waqt kahani nahin likhti

tariKH magar KHun ko pani nahin likhti

ek aisi 'adalat mein hai darKHwast hamari

afsos jo zani ko bhi zani nahin likhti

main is liye zinda hun ki main bol raha hun

duniya kisi gunge ki kahani nahin likhti

har 'umr ka ehsas badal deta hai kapDe

rudad laDak-pan ki jawani nahin likhti

main bhi kabhi zaKHmon ki numaish nahin karta

wo bhi kabhi mazi ki kahani nahin likhti

ghar ko kabhi malba nahin kahti hai mohabbat

wo apni haweli ko purani nahin likhti

nuqsan 'wasim' is mein hai duniya ka hi lekin

phir bhi wo meri talKH-bayani nahin likhti