ہاتھ کٹتے ہیں جہاں سینہ و سر کھلتے ہیں

ہاتھ کٹتے ہیں جہاں سینہ و سر کھلتے ہیں

ایسے ماحول میں ہم اہل ہنر کھلتے ہیں

دن نکلتا ہو جہاں خوف کا نیزہ بن کر

ایسی بستی میں کہاں رات کو در کھلتے ہیں

کیسے آسیب کا سایہ ہے مرے رستے پر

گرد چھٹتی ہے نہ اسرار سفر کھلتے ہیں

ہم نے اک عمر گزاری ہے انہی خوابوں میں

اب قفس ٹوٹتا ہے اور ابھی پر کھلتے ہیں

رخ پہ گلشن کے کھلیں جس کے دریچے اکثر

سوئے صحرا بھی اسی شہر کے در کھلتے ہیں

جن زمینوں پہ کھرے لوگ بسا لیں خود کو

راستے سیل بلا کے بھی ادھر کھلتے ہیں

اہل ساحل سے کہو کشف کی صورت رزمیؔ

موج کھلتی ہے کبھی ہم پہ بھنور کھلتے ہیں