hath pakaD kar andar tak le jate hain

haath pakaḌ kar andar tak le jaate haiñ

kuchh manzar pas-manzar tak le jaate haiñ

ham ko dīvāroñ se koī pyaar nahīñ

kuchh bachche haiñ jo ghar tak le jaate haiñ

roz irāda karte haiñ mar jaane kā

roz gale ko ḳhanjar tak le jaate haiñ

chaḌhne vaalo zīnoñ kī tā'zīm karo

ziine hī to uupar tak le jaate haiñ

bujh jaate haiñ ham bhī sūraj ke hamrāh

raakh uThā kar bistar tak le jaate haiñ

yā daftar ko le aate haiñ ghar ke paas

yā ghar ko hī daftar tak le jaate haiñ

ek parinda hai jo uḌtā rahtā hai

log nishāne shahpar tak le jaate haiñ

hath pakaD kar andar tak le jate hain

kuchh manzar pas-manzar tak le jate hain

hum ko diwaron se koi pyar nahin

kuchh bachche hain jo ghar tak le jate hain

roz irada karte hain mar jaane ka

roz gale ko KHanjar tak le jate hain

chaDhne walo zinon ki ta'zim karo

zine hi to upar tak le jate hain

bujh jate hain hum bhi suraj ke hamrah

rakh uTha kar bistar tak le jate hain

ya daftar ko le aate hain ghar ke pas

ya ghar ko hi daftar tak le jate hain

ek parinda hai jo uDta rahta hai

log nishane shahpar tak le jate hain