hathon mein aaj ki shab mehndi lagaiyega

hāthoñ meñ aaj kī shab mehñdī lagā.iyegā

samjhe ye rañg ham bhī kuchh rañg lā.iyegā

ye shoḳhiyāñ tumhārī likkhī huī haiñ dil par

āḳhir kabhī to mere qaabū meñ ā.iyegā

phir maiñ bhī kuchh kahūñgā dekho zabān roko

phir muñh chhupā ke mujh se aañsū bahā.iyegā

zāt-e-sharīf ho tum maiñ ḳhuub jāntā huuñ

tūfān aur koī mujh par uThā.iyegā

haañ sham.a kā maiñ gul huuñ nāseh kī guftugū huuñ

baḌh jā.ūñgā jahāñ tak mujh ko ghaTā.iyegā

ummīd-vār baaqī kuchh aur rah ga.e haiñ

phir bhī naqāb-e-gesū muñh se haTā.iyegā

be-vaj.h ye nahīñ hai andāz guftugū kā

phir kal kī tarah ai jaañ bāteñ sunā.iyegā

maiñ huuñ mizāj-qātil lāzim hai ḳhauf mujh se

jhūTī qasam nahīñ huuñ har-dam jo khā.iyegā

ye kyuuñ hai nā-umīdī dargāh-e-kibriyā se

jo kuchh ki aarzū hai vaisā hī pā.iyegā

mushtāq ne to jaañ dī gul-gū libās kyuuñ ho

ye rañg-e-nau-urūsī kis ko dikhā.iyegā

dekho raqīb aa.e dekho raqīb aa.e

kyā muñh ab aap kā hai jo muñh chhupa.iyegagā

ham ḳhuub jānte haiñ ustādiyāñ tumhārī

mahfil meñ baiThe baiThe āñkheñ milā.iyegā

āḳhir kuchh intihā bhī be-rahmiyoñ kī sāhab

kahiye to āshiqoñ ko kab tak satā.iyegā

mumkin nahīñ jo niyyat badle tumhārī ai jaañ

kyā qahr aaj kī shab ham par na lā.iyegā

kuchh lahza aur Thahro tā-rūh tan se nikle

aa.egī aur aafat gar aap jā.iyegā

samjhe hue haiñ jo kuchh dil meñ bhare hue hai

kaahe ko ā.iyegā kaahe ko ā.iyegā

aao to jald aao dam-bhar ke ba.ad ai jaañ

mujh ko na pā.iyegā mujh ko na pā.iyegā

sun lījiyegā jo kuchh muddat se aarzū hai

fursat ho gar mayassar dam-bhar ko ā.iyegā

kuchh duur maiñ nahīñ huuñ lāzim hai yaad karnī

mānind-e-dil mujhe bhī pahlū meñ pā.iyegā

ThanDī kabhī na hoñgī kyā garmiyāñ tumhārī

āḳhir 'nasīm' kā dil kab tak jalā.iyegā

hathon mein aaj ki shab mehndi lagaiyega

samjhe ye rang hum bhi kuchh rang laiyega

ye shoKHiyan tumhaari likkhi hui hain dil par

aaKHir kabhi to mere qabu mein aaiyega

phir main bhi kuchh kahunga dekho zaban roko

phir munh chhupa ke mujh se aansu bahaiyega

zat-e-sharif ho tum main KHub jaanta hun

tufan aur koi mujh par uThaiyega

han shama ka main gul hun naseh ki guftugu hun

baDh jaunga jahan tak mujh ko ghaTaiyega

ummid-war baqi kuchh aur rah gae hain

phir bhi naqab-e-gesu munh se haTaiyega

be-wajh ye nahin hai andaz guftugu ka

phir kal ki tarah ai jaan baaten sunaiyega

main hun mizaj-qatil lazim hai KHauf mujh se

jhuTi qasam nahin hun har-dam jo khaiyega

ye kyun hai na-umidi dargah-e-kibriya se

jo kuchh ki aarzu hai waisa hi paiyega

mushtaq ne to jaan di gul-gu libas kyun ho

ye rang-e-nau-urusi kis ko dikhaiyega

dekho raqib aae dekho raqib aae

kya munh ab aap ka hai jo munh chhupaiyegaga

hum KHub jaante hain ustadiyan tumhaari

mahfil mein baiThe baiThe aankhen milaiyega

aaKHir kuchh intiha bhi be-rahmiyon ki sahab

kahiye to aashiqon ko kab tak sataiyega

mumkin nahin jo niyyat badle tumhaari ai jaan

kya qahr aaj ki shab hum par na laiyega

kuchh lahza aur Thahro ta-ruh tan se nikle

aaegi aur aafat gar aap jaiyega

samjhe hue hain jo kuchh dil mein bhare hue hai

kahe ko aaiyega kahe ko aaiyega

aao to jald aao dam-bhar ke baad ai jaan

mujh ko na paiyega mujh ko na paiyega

sun lijiyega jo kuchh muddat se aarzu hai

fursat ho gar mayassar dam-bhar ko aaiyega

kuchh dur main nahin hun lazim hai yaad karni

manind-e-dil mujhe bhi pahlu mein paiyega

ThanDi kabhi na hongi kya garmiyan tumhaari

aaKHir 'nasim' ka dil kab tak jalaiyega