hadd-e-fasil to faqat dard ka sahra nikli

hadd-e-fāsil to faqat dard kā sahrā niklī

chashm-e-afsurdagī-e-ḳhushk hī dariyā niklī

sū-ba-sū bhaTke nigāhoñ meñ liye us kī sī

ek sūrat bhī kisī dar na darīcha niklī

ham ki mauhūm sī hasrat bhī liye phirte haiñ

kitne haiñ jin kī har ik ḳhvāhish-e-bejā niklī

ik zarā Thes lagī TuuT ga.ī himmat-e-jāñ

āhanī jis ko samajhte the vo shīsha niklī

chiir kar parda-e-zulmat ko nidā-e-ġhaibī

raushnī bāñTne duniyā ko hamesha niklī

roz-o-shab ik na.ī ummīd na.ī sī uljhan

āzmā.ish jise samjhe the natīja niklī

nā-murādī kā hai kohra sā dil-o-zehn pe vo

koī ḳhvāhish sī to niklī hai magar kyā niklī

umr bhar saath rahe yaad tirī dukh ho ki sukh

kyā samajhte the ise ham ye magar kyā niklī

qarya-e-zar meñ milā ye bhī nazāra har sū

dhuup rañgoñ kī liye duḳhtar-e-havvā niklī

Dar chaTakne kī ḳhushī par hī bikharne kā huā

bū-e-gul phuuT ke jab ġhuncha-ba-ġhuncha niklī

ḳhvāb yuuñ bhī kabhī tābīr meñ apne na Dhale

zindagī apnī kisī ziist kā hissa niklī

kyā sabab hai ki tulā hai tū miTāne pe hameñ

āsmāñ ek bhī kiyā apnī tamannā niklī

vaqt kā koh-e-girāñ kaaT ke farhād banūñ

kāmrānī isī raste se hamesha niklī

hadd-e-fasil to faqat dard ka sahra nikli

chashm-e-afsurdagi-e-KHushk hi dariya nikli

su-ba-su bhaTke nigahon mein liye us ki si

ek surat bhi kisi dar na daricha nikli

hum ki mauhum si hasrat bhi liye phirte hain

kitne hain jin ki har ek KHwahish-e-beja nikli

ek zara Thes lagi TuT gai himmat-e-jaan

aahani jis ko samajhte the wo shisha nikli

chir kar parda-e-zulmat ko nida-e-ghaibi

raushni banTne duniya ko hamesha nikli

roz-o-shab ek nai ummid nai si uljhan

aazmaish jise samjhe the natija nikli

na-muradi ka hai kohra sa dil-o-zehn pe wo

koi KHwahish si to nikli hai magar kya nikli

umr bhar sath rahe yaad teri dukh ho ki sukh

kya samajhte the ise hum ye magar kya nikli

qarya-e-zar mein mila ye bhi nazara har su

dhup rangon ki liye duKHtar-e-hawwa nikli

Dar chaTakne ki KHushi par hi bikharne ka hua

bu-e-gul phuT ke jab ghuncha-ba-ghuncha nikli

KHwab yun bhi kabhi tabir mein apne na Dhale

zindagi apni kisi zist ka hissa nikli

kya sabab hai ki tula hai tu miTane pe hamein

aasman ek bhi kiya apni tamanna nikli

waqt ka koh-e-giran kaT ke farhad banun

kaamrani isi raste se hamesha nikli