hai aam azal hi se faizan mohabbat ka

hai aam azal hī se faizān mohabbat kā

imkān musallam hai imkān mohabbat kā

toḌā nahīñ jā saktā paimān mohabbat kā

nuqsān ḳhud apnā hai nuqsān mohabbat kā

phir un kī nigāhoñ se Takrā.ī mirī nazreñ

phir baḌhne lagā dil meñ tūfān mohabbat kā

ek ek tamannā meñ lākhoñ haiñ tamannā.eñ

armānoñ kī duniyā hai armān mohabbat kā

is vāste muslim kī fitrat meñ mohabbat hai

detā hai sabaq us ko qur.ān mohabbat kā

barbād-e-mohabbat kī hālat hai ajab hālat

hai be-sar-o-sāmānī sāmān mohabbat kā

jazbāt mohabbat ke maiñ laakh chhupātā huuñ

kartī haiñ mirī nazreñ elaan mohabbat kā

goyā mire siine meñ mīzān-e-mohabbat hai

yuuñ dil meñ jigar meñ hai paikān mohabbat kā

vo nuur kā partav hai yā husn kā partav hai

hai diin mohabbat kā īmān mohabbat kā

jo dard kā hāmil hai vo zauq meñ kāmil hai

behis ko nahīñ hotā īqān mohabbat kā

ijmāl ye be-shak hai tafsīl kā ā.īna

mazmūn pe haavī hai unvān mohabbat kā

haiñ us ke tasavvur ko ghere hue armāñ sab

rahtā hai faqīroñ meñ sultān mohabbat kā

aatī hai nazar us meñ iḳhlās kī har sūrat

ā.īna hai ā.īna insān mohabbat kā

nairañg mohabbat kā har sher se zāhir hai

hai 'qadr' kā dīvāñ bhī dīvān mohabbat kā

hai aam azal hi se faizan mohabbat ka

imkan musallam hai imkan mohabbat ka

toDa nahin ja sakta paiman mohabbat ka

nuqsan KHud apna hai nuqsan mohabbat ka

phir un ki nigahon se Takrai meri nazren

phir baDhne laga dil mein tufan mohabbat ka

ek ek tamanna mein lakhon hain tamannaen

armanon ki duniya hai arman mohabbat ka

is waste muslim ki fitrat mein mohabbat hai

deta hai sabaq us ko quran mohabbat ka

barbaad-e-mohabbat ki haalat hai ajab haalat

hai be-sar-o-samani saman mohabbat ka

jazbaat mohabbat ke main lakh chhupata hun

karti hain meri nazren elan mohabbat ka

goya mere sine mein mizan-e-mohabbat hai

yun dil mein jigar mein hai paikan mohabbat ka

wo nur ka partaw hai ya husn ka partaw hai

hai din mohabbat ka iman mohabbat ka

jo dard ka hamil hai wo zauq mein kaamil hai

behis ko nahin hota iqan mohabbat ka

ijmal ye be-shak hai tafsil ka aaina

mazmun pe hawi hai unwan mohabbat ka

hain us ke tasawwur ko ghere hue arman sab

rahta hai faqiron mein sultan mohabbat ka

aati hai nazar us mein iKHlas ki har surat

aaina hai aaina insan mohabbat ka

nairang mohabbat ka har sher se zahir hai

hai 'qadr' ka diwan bhi diwan mohabbat ka