hai dhup-chhanw ki manind zindagi meri

hai dhūp-chhāñv kī mānind zindagī merī

sabāt-e-ġham ko nahīñ aarzī ḳhushī merī

usī ko ab mirī har baat zahr lagtī hai

kabhī pasand na thī jis ko ḳhāmushī merī

tirī nazar kā sahārā baḌā sahārā thā

jahāñ meñ kar na sakā koī hamsarī merī

kabhī gunāh kabhī hasrat-e-gunāh kā ġham

tamām karb-e-musalsal hai zindagī merī

maiñ dil kā haal usī ko sunātā rahtā huuñ

chhupī na jis se koī baat an-kahī merī

maiñ misl-e-kirmak-e-shab-tāb jaltā rahtā huuñ

kisī ke kaam to aa.egī raushnī merī

jo mere ḳhadsha-e-fardā pe ḳhanda-zan haiñ 'ḳhalish'

mirī duā hai mile un ko aa ga.ī merī

hai dhup-chhanw ki manind zindagi meri

sabaat-e-gham ko nahin aarzi KHushi meri

usi ko ab meri har baat zahr lagti hai

kabhi pasand na thi jis ko KHamushi meri

teri nazar ka sahaara baDa sahaara tha

jahan mein kar na saka koi hamsari meri

kabhi gunah kabhi hasrat-e-gunah ka gham

tamam karb-e-musalsal hai zindagi meri

main dil ka haal usi ko sunata rahta hun

chhupi na jis se koi baat an-kahi meri

main misl-e-kirmak-e-shab-tab jalta rahta hun

kisi ke kaam to aaegi raushni meri

jo mere KHadsha-e-farda pe KHanda-zan hain 'KHalish'

meri dua hai mile un ko aa gai meri