hai dil mein junun-KHez parastish ka irada

hai dil meñ junūñ-ḳhez parastish kā irāda

aise meñ munāsib nahīñ ranjish kā irāda

jalne ko hai tayyār matā-e-dil-o-jāñ phir

afsos magar sard hai ātish kā irāda

miTTī kā gharauñdā baḌī mushkil se banā hai

ai kaash badal de koī bārish kā irāda

yuuñ khul ke sar-e-ām na mil mujh se mire dost

duniyā meñ hai zinda abhī sāzish kā irāda

kashkol mohabbat kī talab phir bhaḌak uTThī

dekhā jo ba-zid us meñ navāzish kā irāda

us ne baḌā mohtāt ravayya rakhā phir bhī

lahje se jhalaktā rahā ḳhvāhish kā irāda

us dil kā ilāqa sahī mere liye mamnūa

badlā na ba-har-hāl rihā.ish kā irāda

hai ma.arka-ārā jo 'ḳhayāl' aaj ba-zāhir

rakhtā hai pas-e-taish guzārish kā irāda

hai dil mein junun-KHez parastish ka irada

aise mein munasib nahin ranjish ka irada

jalne ko hai tayyar mata-e-dil-o-jaan phir

afsos magar sard hai aatish ka irada

miTTi ka gharaunda baDi mushkil se bana hai

ai kash badal de koi barish ka irada

yun khul ke sar-e-am na mil mujh se mere dost

duniya mein hai zinda abhi sazish ka irada

kashkol mohabbat ki talab phir bhaDak uTThi

dekha jo ba-zid us mein nawazish ka irada

us ne baDa mohtat rawayya rakha phir bhi

lahje se jhalakta raha KHwahish ka irada

us dil ka ilaqa sahi mere liye mamnua

badla na ba-har-haal rihaish ka irada

hai marka-ara jo 'KHayal' aaj ba-zahir

rakhta hai pas-e-taish guzarish ka irada