hai jaisi ishq bala dusri bala koi hai

hai jaisī 'ishq balā dūsrī balā koī hai

magar hai is meñ jo us lutf sā mazā koī hai

samā'atoñ meñ ye kyoñ jal-tarang bajne lage

ye kaisī dil pe hai dastak Thahar zarā koī hai

mahak se rang se sur se hai 'ishq hone lagā

jo dil meñ jhāñk ke dekhā to ye khulā koī hai

tanābeñ TūTne lagtī haiñ kyoñ rag-e-jāñ kī

jo khīñchtā hai tirī samt silsila koī hai

paḌāo hai ye faqat itnā ehtimām na kar

jahāñ meñ kaun rahā hai sadā batā koī hai

kamāl-e-husn 'atā-e-suḳhan pe itnā ġhurūr

hai kaun suntā tujhe tujh ko dekhtā koī hai

lagā na aas ki ik shahr-e-nāsipās hai ye

koī nahīñ hai yahāñ dard-āshnā koī hai

samā'atoñ se the 'aarī makīn-e-shahr sabhī

ujaaḌ galiyoñ meñ dil chīḳhtā rahā koī hai

lagā.e maut gale kab kisī ko kyā mā'lūm

so zindagī kā bhī ab e'tibār kyā koī hai

pukārtī phirī is shahr-e-sang meñ 'nasrīn'

dhaḌaktā dil hai koī zehn sochtā koī hai

hai jaisi 'ishq bala dusri bala koi hai

magar hai is mein jo us lutf sa maza koi hai

sama'aton mein ye kyon jal-tarang bajne lage

ye kaisi dil pe hai dastak Thahar zara koi hai

mahak se rang se sur se hai 'ishq hone laga

jo dil mein jhank ke dekha to ye khula koi hai

tanaben TuTne lagti hain kyon rag-e-jaan ki

jo khinchta hai teri samt silsila koi hai

paDao hai ye faqat itna ehtimam na kar

jahan mein kaun raha hai sada bata koi hai

kamal-e-husn 'ata-e-suKHan pe itna ghurur

hai kaun sunta tujhe tujh ko dekhta koi hai

laga na aas ki ek shahr-e-nasipas hai ye

koi nahin hai yahan dard-ashna koi hai

sama'aton se the 'ari makin-e-shahr sabhi

ujaD galiyon mein dil chiKHta raha koi hai

lagae maut gale kab kisi ko kya ma'lum

so zindagi ka bhi ab e'tibar kya koi hai

pukarti phiri is shahr-e-sang mein 'nasrin'

dhaDakta dil hai koi zehn sochta koi hai