ہے نفس نفس تری آرزو ہے قدم قدم تری جستجو

ہے نفس نفس تری آرزو ہے قدم قدم تری جستجو

میں جہاں رہوں میں کہیں چلوں تری یاد ملتی ہے کو بہ کو

ہے ہوا میں جیسے مہک تری کسی ابر میں ہے جھلک تیری

مری شام کے یہ نقوش بھی ترے جیسے لگتے ہیں ہو بہ ہو

کبھی اشک سے مری آنکھ نم کبھی خوں سے جسم یہ تر بہ تر

ترے عشق کی یہ نماز بھی پڑھوں کیسے دوست میں بے وضو

ہے بدن میں تیری ہی آہٹیں ترے نام کی ہیں یہ دھڑکنیں

مرا دل بھی کیسے یہ مان لے کہ چلا گیا کہیں دور تو

یوں لبوں پہ میرے ہنسی بھی ہے وہیں آنکھ میں یہ نمی بھی ہے

میں امام کوئی ہوں درد کا میں ہوں فطرتاً ہی اداس خو

مرے لب پہ اس کا بیان ہے مرے شعروں کی وہی جان ہے

جسے کہہ رہے ہو غزل مری مرے یار کی ہے وہ گفتگو