hai shauq to be-saKHta aankhon mein samo lo

hai shauq to be-sāḳhta āñkhoñ meñ samo lo

yuuñ mujh ko nigāhoñ ke tarāzū meñ na tolo

maiñ bhī huuñ kisī aañkh se Tapkā huā motī

mujh ko bhī kisī reshmī Dorī meñ piro lo

laayā huuñ maiñ ḳhud dil ko hathelī pe sajā kar

is jins ke bāzār meñ kyā daam haiñ bolo

maiñ kāñch ke TukḌoñ kī tarah bikhrā paḌā huuñ

bhūle se kabhī mujh ko bhī paañv meñ chubho lo

phir jāniye kab vaqt kī raftār thamegī

Thahre hue lamhe ko nigāhoñ meñ piro lo

ab koī bikheregā kaḌī dhuup meñ gesū

ḳhud apne hī dil ke kisī tah-ḳhāne meñ so lo

din bhar to 'rashīd' aap ko hañsnā hī paḌegā

ronā hai to ab raat kī tanhā.ī meñ ro lo

hai shauq to be-saKHta aankhon mein samo lo

yun mujh ko nigahon ke taraazu mein na tolo

main bhi hun kisi aankh se Tapka hua moti

mujh ko bhi kisi reshmi Dori mein piro lo

laya hun main KHud dil ko hatheli pe saja kar

is jins ke bazar mein kya dam hain bolo

main kanch ke TukDon ki tarah bikhra paDa hun

bhule se kabhi mujh ko bhi panw mein chubho lo

phir jaaniye kab waqt ki raftar thamegi

Thahre hue lamhe ko nigahon mein piro lo

ab koi bikherega kaDi dhup mein gesu

KHud apne hi dil ke kisi tah-KHane mein so lo

din bhar to 'rashid' aap ko hansna hi paDega

rona hai to ab raat ki tanhai mein ro lo