hai tasawwur mujhe har dam teri yaktai ka

hai tasavvur mujhe har dam tirī yaktā.ī kā

mashġhala aaTh pahar hai yahī tanhā.ī kā

ishq meñ rashk hamesha se chalā aatā hai

dekho qābīl ne kyā haal kiyā bhaa.ī kā

jām-e-sā.il kī tarah haiñ mirī āñkheñ dar dar

jab se āshiq kisī kāfir-e-shaidā.ī kā

ishq-e-kāmil jo huā nañg kahāñ aar kahāñ

dhyān badmast ko rahtā nahīñ rusvā.ī kā

hijr meñ gardish-e-behūda jo hai ai saaqī

jaam kyā kāsa-e-sar hai kisī saudā.ī kā

merī āñkhoñ ne tujhe dekh ke vo kuchh dekhā

ki zabān-e-mizha par shikva hai bīnā.ī kā

qadam aġhyār kā rakhnā ho gavārā kyuuñ kar

tere dar par hai mujhe shaġhl jabīñ-sā.ī kā

mujh se rahtā hai ramīda vo ġhazāl-e-shahrī

saaf sīkhā hai chalan āhū-e-sahrā.ī kā

hijr meñ chaTke jo ġhunche huī āvāz tufañg

sehn-e-gulzār hai maidān-e-saf-ārā.ī kā

jis ne dekhā tujhe ai yaar huā dīvāna

hai tamāshā tire har ek tamāshā.ī kā

sabza rañgoñ kā ye hai ḳhaak muqarrar 'nāsiḳh'

sabz rañg is liye aatā hai nazar kaa.ī kā

hai tasawwur mujhe har dam teri yaktai ka

mashghala aaTh pahar hai yahi tanhai ka

ishq mein rashk hamesha se chala aata hai

dekho qabil ne kya haal kiya bhai ka

jam-e-sail ki tarah hain meri aankhen dar dar

jab se aashiq kisi kafir-e-shaidai ka

ishq-e-kaamil jo hua nang kahan aar kahan

dhyan badmast ko rahta nahin ruswai ka

hijr mein gardish-e-behuda jo hai ai saqi

jam kya kasa-e-sar hai kisi saudai ka

meri aankhon ne tujhe dekh ke wo kuchh dekha

ki zaban-e-mizha par shikwa hai binai ka

qadam aghyar ka rakhna ho gawara kyun kar

tere dar par hai mujhe shaghl jabin-sai ka

mujh se rahta hai ramida wo ghazal-e-shahri

saf sikha hai chalan aahu-e-sahrai ka

hijr mein chaTke jo ghunche hui aawaz tufang

sehn-e-gulzar hai maidan-e-saf-arai ka

jis ne dekha tujhe ai yar hua diwana

hai tamasha tere har ek tamashai ka

sabza rangon ka ye hai KHak muqarrar 'nasiKH'

sabz rang is liye aata hai nazar kai ka