hain kabhi wo multafit hum par kabhi bezar hain

haiñ kabhī vo multafit ham par kabhī bezār haiñ

pūchh mat kis kashmakash se jān-o-dil do-chār haiñ

baat hai mazlūm kī to gung mere yaar haiñ

khul chukā mujh par vo kis ke hāshiya-bardār haiñ

'ishq meñ yuuñ bhī suhūlat se haiñ miltī manzileñ

Duube un āñkhoñ ke sāgar meñ to samjho paar haiñ

aisī az-ḳhud-raftagī mai kī kahāñ marhūn hai

hai koī chashm-e-ḳhumār-āgīñ ki ham sarshār haiñ

de ke ranj-o-ġham hameñ un kī ḳhushī hai dīdanī

kyā ḳhabar un ko ki ham ḳhud darpa.e-āzār haiñ

paañv meñ chakkar hai yā phir khel hai taqdīr kā

'umr biitī apne kāñdhoñ par liye ghar-bār haiñ

vo kamar-basta jafā par apnī ḳhū sabr-o-razā

vo bhī mushkil hai vahāñ ham bhī yahāñ dushvār haiñ

aur hī sar haiñ jinheñ mansab ye hotā hai 'atā

raunaq-e-maidān-e-haq haiñ yā vo zeb-e-dār haiñ

kyā kahūñ 'nasrīn' sab haiñ ḳhvāb-e-ġhaflat ke asiir

be-basīrat haiñ magar ye zo'm hai bedār haiñ

hain kabhi wo multafit hum par kabhi bezar hain

puchh mat kis kashmakash se jaan-o-dil do-chaar hain

baat hai mazlum ki to gung mere yar hain

khul chuka mujh par wo kis ke hashiya-bardar hain

'ishq mein yun bhi suhulat se hain milti manzilen

Dube un aankhon ke sagar mein to samjho par hain

aisi az-KHud-raftagi mai ki kahan marhun hai

hai koi chashm-e-KHumar-agin ki hum sarshaar hain

de ke ranj-o-gham hamein un ki KHushi hai didani

kya KHabar un ko ki hum KHud darpae-azar hain

panw mein chakkar hai ya phir khel hai taqdir ka

'umr biti apne kandhon par liye ghar-bar hain

wo kamar-basta jafa par apni KHu sabr-o-raza

wo bhi mushkil hai wahan hum bhi yahan dushwar hain

aur hi sar hain jinhen mansab ye hota hai 'ata

raunaq-e-maidan-e-haq hain ya wo zeb-e-dar hain

kya kahun 'nasrin' sab hain KHwab-e-ghaflat ke asir

be-basirat hain magar ye zo'm hai bedar hain