حیرت سے اپنا چہرہ وہ دیکھا کیا گیا

حیرت سے اپنا چہرہ وہ دیکھا کیا گیا

بکھرا ہوا جو دل مرا یکجا کیا گیا

اک عکس کو دوام دلایا گیا ہے آج

کوئی تو کام آنکھ سے اچھا کیا گیا

ہر شخص دیکھتا جسے اپنی نظر سے ہے

کیوں درد سارے شہر پہ افشا کیا گیا

یک لخت واہمے کی چبھن اور بڑھ گئی

جب جستجو کو تن کا لبادہ کیا گیا

یہ دل تغیرات کا مارا ڈسا یہ دل

گلشن کیا گیا کبھی صحرا کیا گیا

دل کو ہمارے وہ ہی دعاؔ توڑتا گیا

جس شخص پر بھی دل سے بھروسا کیا گیا