ham āj-kal haiñ nāma-navīsī kī taav par
din-bhar kabūtaroñ ko bhagāte haiñ baav par
rindoñ ko ek roz to dariyā-dilī dikhā
kashtī-e-mai ko chhoḌ de saaqī bahāo par
likkhūñ vo sher-e-āriz-e-rañgīñ kī vasf-bīñ
taḳhta chaman kā sadqe hoñ kāġhaz kī naav par
kuchh hājat-e-kabāb nahīñ kaif-e-ishq meñ
sīḳheñ dil-o-jigar kī lagīñ haiñ alaav par
be-minnat-e-jahān-e-tunuk-zarf agar mile
vallāh phir to charb hai ḳhashā pulāv par
qaane kī muñh se ne.mat-e-duniyā ḳhafīf hai
bhārī hai paav naan mire naan paav par
āfat-nishāñ haiñ dīda-e-fattāñ kī putliyāñ
tash.hīr sāmrī ko kareñge ye gaav par
bāzīcha-gāh-e-ishq meñ vo huuñ qimār-bāz
donoñ jahān rakh diye haiñ ek daav par
kyuuñ kar barātiyoñ se na ghūñghaT kare dulhan
saarī sabhā miTī hai tumhāre banāv par
gul-gasht kī havas chamanistāñ kī aarzū
ai be-qarāriyo mire dil ko lagāv par
kartā huuñ maiñ jo marham-e-kāfūr kī talāsh
kartī hai chāñdnī mirī siine ke ghaav par
kashtī-e-mai lagī rahī saaqī laboñ ke ghaaT
ham mai-kashoñ kā qāfila hai chal-chalāv par
maiñ jal meñ aa gayā vo na aayā fareb meñ
maiñ zad pe chaḌh gayā vo na Therā lagāv par
parvāne kī tarah na bujhā de charāġh-e-husn
tūtī-e-ḳhat ke ātish-e-ruḳh se jalāo par
ilm-e-safīna us ko tujhe ilm-e-sīna 'bahr'
tū pul par aur shaiḳh hai kāġhaz kī naav par
hum aaj-kal hain nama-nawisi ki taw par
din-bhar kabutaron ko bhagate hain baw par
rindon ko ek roz to dariya-dili dikha
kashti-e-mai ko chhoD de saqi bahao par
likkhun wo sher-e-ariz-e-rangin ki wasf-bin
taKHta chaman ka sadqe hon kaghaz ki naw par
kuchh hajat-e-kabab nahin kaif-e-ishq mein
siKHen dil-o-jigar ki lagin hain alaw par
be-minnat-e-jahan-e-tunuk-zarf agar mile
wallah phir to charb hai KHasha pulaw par
qane ki munh se nemat-e-duniya KHafif hai
bhaari hai paw nan mere nan paw par
aafat-nishan hain dida-e-fattan ki putliyan
tashhir samri ko karenge ye gaw par
bazicha-gah-e-ishq mein wo hun qimar-baz
donon jahan rakh diye hain ek daw par
kyun kar baraatiyon se na ghunghaT kare dulhan
sari sabha miTi hai tumhaare banaw par
gul-gasht ki hawas chamanistan ki aarzu
ai be-qarariyo mere dil ko lagaw par
karta hun main jo marham-e-kafur ki talash
karti hai chandni meri sine ke ghaw par
kashti-e-mai lagi rahi saqi labon ke ghaT
hum mai-kashon ka qafila hai chal-chalaw par
main jal mein aa gaya wo na aaya fareb mein
main zad pe chaDh gaya wo na Thera lagaw par
parwane ki tarah na bujha de charagh-e-husn
tuti-e-KHat ke aatish-e-ruKH se jalao par
ilm-e-safina us ko tujhe ilm-e-sina 'bahr'
tu pul par aur shaiKH hai kaghaz ki naw par
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.