hum agar arz-e-muddaa na karen

ham agar 'arz-e-mudda'ā na kareñ

aap kyā kuchh hameñ 'atā na kareñ

aap mālik haiñ apnī marzī ke

aap vā'da kareñ vafā na kareñ

maiñ huuñ dīvāna merī bātoñ ko

aap bhī ġhaur se sunā na kareñ

maiñ marīz-e-ġham-e-mohabbat huuñ

mere haq meñ koī du'ā na kareñ

har sitam kī ik 'umr hotī hai

aap ab zulm-e-nā-ravā na kareñ

mujh ko pahnā ke 'ishq kī zanjīr

zindagī bhar mujhe rihā na kareñ

mujrim-e-‘ishq mujh ko Thahrā kar

mujh se duniyā ko āshnā na kareñ

zulmateñ duur ho nahīñ saktīñ

aap agar dil ko pur-ziyā na kareñ

aap ko kaun dekh saktā hai

aap jab tak nazar 'atā na kareñ

pīr-e-mai-ḳhāna jaam de aisā

ham kabhī hosh meñ rahā na kareñ

hai taqāzā ye 'ishq kā 'sādiq'

ham kisī baat kā gila na kareñ

hum agar 'arz-e-mudda'a na karen

aap kya kuchh hamein 'ata na karen

aap malik hain apni marzi ke

aap wa'da karen wafa na karen

main hun diwana meri baaton ko

aap bhi ghaur se suna na karen

main mariz-e-gham-e-mohabbat hun

mere haq mein koi du'a na karen

har sitam ki ek 'umr hoti hai

aap ab zulm-e-na-rawa na karen

mujh ko pahna ke 'ishq ki zanjir

zindagi bhar mujhe riha na karen

mujrim-e-‘ishq mujh ko Thahra kar

mujh se duniya ko aashna na karen

zulmaten dur ho nahin saktin

aap agar dil ko pur-ziya na karen

aap ko kaun dekh sakta hai

aap jab tak nazar 'ata na karen

pir-e-mai-KHana jam de aisa

hum kabhi hosh mein raha na karen

hai taqaza ye 'ishq ka 'sadiq'

hum kisi baat ka gila na karen