ہم اہل دل کا سمجھئے قرار باقی ہے

ہم اہل دل کا سمجھئے قرار باقی ہے

کہیں کوئی جو محبت شعار باقی ہے

کھلی ہی رہ گئیں بیمار ہجر کی آنکھیں

حیات بیت گئی انتظار باقی ہے

تباہیوں کے صلے میں سکون دل کے لیے

تصور نگۂ شرمسار باقی ہے

لہو کے پھول کھلے ہیں روش روش دیکھو

مرے چمن میں ابھی تک بہار باقی ہے

اگر ادھر سے کوئی کارواں نہیں گزرا

تو پھر یہ راہ میں کیسا غبار باقی ہے

صلیب و دار اسی کی تو سرخیاں ہیں رئیسؔ

وہ داستاں جو سر کوئے یار باقی ہے