hum apni suraton se mumasil nahin rahe

ham apnī sūratoñ se mumāsil nahīñ rahe

ek umr aa.ine ke muqābil nahīñ rahe

majbūriyāñ kuchh aur hī lāhaq rahīñ hameñ

dil se tire ḳhilāf to ai dil nahīñ rahe

ab vaqt ne paḌhāye to paḌhne paḌe tamām

asbāq jo nisāb meñ shāmil nahīñ rahe

be-chehragī kā dukh bhī bahut hai magar ye ranj

ham terī ik nigāh ke qābil nahīñ rahe

umr-e-ravāñ ke moḌ pe kuchh ḳhvāb mere ḳhvāb

kho.e ga.e haiñ aise ki ab mil nahīñ rahe

apne liye hameñ kabhī fursat na mil sakī

us ko gila ki ham use hāsil nahīñ rahe

kyā raat thī ki shahr kī sūrat badal ga.ī

ham e'tibār-e-sub.h ke qābil nahīñ rahe

hum apni suraton se mumasil nahin rahe

ek umr aaine ke muqabil nahin rahe

majburiyan kuchh aur hi lahaq rahin hamein

dil se tere KHilaf to ai dil nahin rahe

ab waqt ne paDhaye to paDhne paDe tamam

asbaq jo nisab mein shamil nahin rahe

be-chehragi ka dukh bhi bahut hai magar ye ranj

hum teri ek nigah ke qabil nahin rahe

umr-e-rawan ke moD pe kuchh KHwab mere KHwab

khoe gae hain aise ki ab mil nahin rahe

apne liye hamein kabhi fursat na mil saki

us ko gila ki hum use hasil nahin rahe

kya raat thi ki shahr ki surat badal gai

hum e'tibar-e-subh ke qabil nahin rahe