ہم دل جلوں کے سامنے باتیں وصال کی

ہم دل جلوں کے سامنے باتیں وصال کی

ظالم تری سزائیں ہیں کتنے کمال کی

اس حسن پہ تمہارے کئی تبصرے ہوئے

تعریف ہو رہی ہے ہمارے خیال کی

تم نے ذرا سی بات پہ ٹھکرا دیا مجھے

اب کھوج کر رہے ہو کسی خوش خصال کی

یہ بھی ذرا بتاؤ تکبر کی زد میں تھے

گر تم سنا رہے ہو کہانی زوال کی

سو بار اس کا شکر کریں کیوں نہ ہم ادا

ہم کو کھلا رہا ہے جو روزی حلال کی

ہم کو بھی اپنی ایک جھلک ہی دکھاؤ نا

باتیں بہت سنی ہیں تمہارے جمال کی

امید ہے اٹھاؤ گے تم بھی دعا کو ہاتھ

جس دن خبر سنو گے مرے انتقال کی