ہم ایک دوسرے کے اس قدر خمار میں ہیں

ہم ایک دوسرے کے اس قدر خمار میں ہیں

بچھڑ چکے ہیں مگر پھر بھی انتظار میں ہیں

کمان کھینچنے والو کو اس کا علم نہیں

ہدف میں ہیں ہی نہیں ہم تو آر پار میں ہیں

یہ بات سچ ہے مگر ہم ہی دیر میں سمجھے

نہ اس کے اور نہ ہم اپنے اختیار میں ہیں

مسافروں کی تھکن یہ بتا رہی ہے ہمیں

انہیں خبر ہی نہیں ہے وہ کس دیار میں ہیں

وہ اہل ظرف تھے سایا تلاش کرتے رہے

ہم اہل کشف ہیں اڑتے ہوئے غبار میں ہیں

جو خواب ٹوٹ گئے صبر دے گئے مجھ کو

جو خواب بچ گئے وہ چشم اشک بار میں ہیں