hum ek roz usko bhulane nikal gae

ham ek roz us ko bhulāne nikal ga.e

jab aa.e lauT kar to zamāne nikal ga.e

ik shaḳhs jā rahā thā hamārā zamīn se

ham āsmān sar pe uThāne nikal ga.e

tū to ḳhamosh ho gayā phir ham galī galī

terī taraf kā shor machāne nikal ga.e

jab jab hamāre haath meñ aa.e hamāre paañv

un kī galī meñ ḳhaak uḌāne nikal ga.e

us kam-suḳhan ne aaj bahut khul ke baat kī

muflis kī jhopḌī se ḳhazāne nikal ga.e

bilkul na.ī zabān thī us ke kalām meñ

lekin hamāre kaan purāne nikal ga.e

jab jab bhī yaad aa.iiñ tumhārī hatheliyāñ

ham dostoñ se haath milāne nikal ga.e

hum ek roz us ko bhulane nikal gae

jab aae lauT kar to zamane nikal gae

ek shaKHs ja raha tha hamara zamin se

hum aasman sar pe uThane nikal gae

tu to KHamosh ho gaya phir hum gali gali

teri taraf ka shor machane nikal gae

jab jab hamare hath mein aae hamare panw

un ki gali mein KHak uDane nikal gae

us kam-suKHan ne aaj bahut khul ke baat ki

muflis ki jhopDi se KHazane nikal gae

bilkul nai zaban thi us ke kalam mein

lekin hamare kan purane nikal gae

jab jab bhi yaad aain tumhaari hatheliyan

hum doston se hath milane nikal gae