hum faiz raushni se uThaenge kitni der

ham faiz raushnī se uThā.eñge kitnī der

jugnū hamāre sehn meñ Thahreñge kitnī der

kab tak numū-pazīr rahegā ye dasht-e-dil

bādal ḳhushī ke barseñ to barseñge kitnī der

toḌo ta'alluqāt kī baisākhiyāñ tamām

jhūTe sahāre saath nibāheñge kitnī der

saaya saroñ ko deñge kahāñ tak buzurg log

be-barg ḳhushk peḌ havā deñge kitnī der

kab tak raheñge qaid-e-anā ke hisār meñ

kāġhaz kī naav aap chalā.eñge kitnī der

sho'la bhaḌak ke ḳhatm huā raakh ho gayā

ham raakh meñ sharar koī DhūñDeñge kitnī der

tār-e-nafas ke saath the rishtoñ ke silsile

mere 'azīz qabr pe Thahreñge kitnī der

do chaar lahreñ mere safīne ko haiñ bahut

sāhil se aap Dūbte dekheñge kitnī der

kitnā koī kisī ke bichhaḌne kā ġham kare

ham bhī kisī ke vāste ro.eñge kitnī der

mūñde raheñge kab talak āñkhoñ ko ham 'qamar'

ḳhvāboñ ko TūTne se bachā.eñge kitnī der

hum faiz raushni se uThaenge kitni der

jugnu hamare sehn mein Thahrenge kitni der

kab tak numu-pazir rahega ye dasht-e-dil

baadal KHushi ke barsen to barsenge kitni der

toDo ta'alluqat ki baisakhiyan tamam

jhuTe sahaare sath nibahenge kitni der

saya saron ko denge kahan tak buzurg log

be-barg KHushk peD hawa denge kitni der

kab tak rahenge qaid-e-ana ke hisar mein

kaghaz ki naw aap chalaenge kitni der

sho'la bhaDak ke KHatm hua rakh ho gaya

hum rakh mein sharar koi DhunDenge kitni der

tar-e-nafas ke sath the rishton ke silsile

mere 'aziz qabr pe Thahrenge kitni der

do chaar lahren mere safine ko hain bahut

sahil se aap Dubte dekhenge kitni der

kitna koi kisi ke bichhaDne ka gham kare

hum bhi kisi ke waste roenge kitni der

munde rahenge kab talak aankhon ko hum 'qamar'

KHwabon ko TuTne se bachaenge kitni der