hum jinhen haal-e-dil-e-zar sunane nikle

ham jinheñ hāl-e-dil-e-zār sunāne nikle

un ke to aur alamnāk fasāne nikle

sū-e-mai-ḳhāna vo masjid ke bahāne nikle

shaiḳh jī rind se baḌh kar bhī siyāne nikle

haath vo dhone ko bahtī huī gangā kī bajā.e

apne hī ḳhuun ke dariyā meñ nahāne nikle

ab ke shabnam bhī 'ajab barsī 'ajab sho'le bhī

barf ke phuul khile dhuup ke daane nikle

apnā chehra jo na pahchān sake saarī 'umr

aa.ina le ke vo auroñ ko dikhāne nikle

bāġhbāñ ne jise sīñchā thā lahū se apne

pattharoñ meñ bhī vahī phuul khilāne nikle

she'r-goī meñ nahīñ rakhte jo aap apnā javāb

tum 'hasan' she'r unheñ aaj sunāne nikle

hum jinhen haal-e-dil-e-zar sunane nikle

un ke to aur alamnak fasane nikle

su-e-mai-KHana wo masjid ke bahane nikle

shaiKH ji rind se baDh kar bhi siyane nikle

hath wo dhone ko bahti hui ganga ki bajae

apne hi KHun ke dariya mein nahane nikle

ab ke shabnam bhi 'ajab barsi 'ajab sho'le bhi

barf ke phul khile dhup ke dane nikle

apna chehra jo na pahchan sake sari 'umr

aaina le ke wo auron ko dikhane nikle

baghban ne jise sincha tha lahu se apne

pattharon mein bhi wahi phul khilane nikle

she'r-goi mein nahin rakhte jo aap apna jawab

tum 'hasan' she'r unhen aaj sunane nikle