ہم جو اوڑھے ہوئے احساس کی چادر نکلے

ہم جو اوڑھے ہوئے احساس کی چادر نکلے

جن کو انسان سمجھتے تھے وہ پتھر نکلے

خشک موسم تھا مگر ڈوب گئے اہل زمیں

ہم نے پتھر جو ہٹائے تو سمندر نکلے

بیعت دست یزیدی مجھے منظور نہیں

مری اس بات پہ ہر سمت سے خنجر نکلے

بستیاں بھی تو درندوں سے نہیں ہیں محفوظ

گھر سے نکلے بھی کوئی شخص تو کیوں کر نکلے

جبر تہذیب کی تاریخ یہی ہے اب تک

ایک دیوار گرائی تو کئی گھر نکلے

ان کے چہرے بھی نظر آئے ہیں دھندلے زریںؔ

آئنہ خانوں سے جو لوگ سنور کر نکلے