hum KHuda kahte hain sab jis ko sanam kahte hain

ham ḳhudā kahte haiñ sab jis ko sanam kahte haiñ

tum na kahnā use allāh jo ham kahte haiñ

ranj kahte haiñ kise kis ko alam kahte haiñ

ham to is ko bhī tirā fazl-o-karam kahte haiñ

paḌ ke bīmār ayādat ko bulāyā tujh ko

dekh o rashk-e-masīhā ise dam kahte haiñ

log dete haiñ tire qad ko alam se tashbīh

ham tirī zulf ko dāmān-e-alam kahte haiñ

apnī bīmār se ab tak to hai sūjā-phūlā

haath paañv pe chaḌh aaya hai varam kahte haiñ

sar bhī kaT jaa.e to ai yaar na khā.eñ kabhī ham

jis ko kahte haiñ qasam ham use sam kahte haiñ

jo janāza hai vo insāñ ko nasīhat-gar hai

va.az kyā rāh-rav-e-mulk-e-adam kahte haiñ

khol kar nāma-e-a.amāl to apnā dekheñ

māl-o-asbāb ko jo log raqam kahte haiñ

us ne bhejī hai jo ye phuul kī botal ham ko

ham use naḳhl-e-mohabbat kī qalam kahte haiñ

qissa-e-ishq ko kab ek zabāñ kaafī hai

kabhī karte haiñ bayāñ vo kabhī ham kahte haiñ

chashm-o-abrū-e-butāñ shaiḳh-o-barahman dekheñ

dair kahte haiñ ise is ko haram kahte haiñ

mere nazdīk to ye kam nahīñ izzat merī

mujh ko vo banda-e-be-dām-o-diram kahte haiñ

sifat-e-kātib-e-taqdīr ke likhne vaale

arsa-e-hashr ko maidān-e-qalam kahte haiñ

log kahte haiñ jise pamba-e-mīnā saaqī

rind-e-mai-ḳhvār use abr-e-karam kahte haiñ

sā.il-e-bosa ko tum ne na diyā haa.e javāb

kuchh na kuchh muñh se bashar lā-o-na'am kahte haiñ

'kaif' hai yaad jinheñ kalima-e-mūtū har dam

apnī is hastī-e-fānī ko adam kahte haiñ

hum KHuda kahte hain sab jis ko sanam kahte hain

tum na kahna use allah jo hum kahte hain

ranj kahte hain kise kis ko alam kahte hain

hum to is ko bhi tera fazl-o-karam kahte hain

paD ke bimar ayaadat ko bulaya tujh ko

dekh o rashk-e-masiha ise dam kahte hain

log dete hain tere qad ko alam se tashbih

hum teri zulf ko daman-e-alam kahte hain

apni bimar se ab tak to hai suja-phula

hath panw pe chaDh aaya hai waram kahte hain

sar bhi kaT jae to ai yar na khaen kabhi hum

jis ko kahte hain qasam hum use sam kahte hain

jo janaza hai wo insan ko nasihat-gar hai

waz kya rah-raw-e-mulk-e-adam kahte hain

khol kar nama-e-amal to apna dekhen

mal-o-asbab ko jo log raqam kahte hain

us ne bheji hai jo ye phul ki botal hum ko

hum use naKHl-e-mohabbat ki qalam kahte hain

qissa-e-ishq ko kab ek zaban kafi hai

kabhi karte hain bayan wo kabhi hum kahte hain

chashm-o-abru-e-butan shaiKH-o-barahman dekhen

dair kahte hain ise is ko haram kahte hain

mere nazdik to ye kam nahin izzat meri

mujh ko wo banda-e-be-dam-o-diram kahte hain

sifat-e-katib-e-taqdir ke likhne wale

arsa-e-hashr ko maidan-e-qalam kahte hain

log kahte hain jise pamba-e-mina saqi

rind-e-mai-KHwar use abr-e-karam kahte hain

sail-e-bosa ko tum ne na diya hae jawab

kuchh na kuchh munh se bashar la-o-na'am kahte hain

'kaif' hai yaad jinhen kalima-e-mutu har dam

apni is hasti-e-fani ko adam kahte hain