hum ki lamhat ke tewar pe nazar rakhte hain

ham ki lamhāt ke tevar pe nazar rakhte haiñ

dekh har haal meñ jiine kā hunar rakhte haiñ

ġhair kī raah pe chalnā nahīñ fitrat apnī

ham zamāne se judā apnī Dagar rakhte haiñ

jo kaTe haq ke liye raunaq-e-maqtal Thahre

ham sajā.e hue shānoñ pe vo sar rakhte haiñ

be-nishānī to muqaddar hai azal se apnā

apnī pahchān kā ik naqsh magar rakhte haiñ

ham vahī ḳhāk-nashīñ haiñ ki zamīñ par rah kar

charḳh ke chāñd sitāroñ pe guzar rakhte haiñ

ham ko āsā.ish-e-manzil na sadā denā kabhī

vo musāfir haiñ ki pairoñ meñ safar rakhte haiñ

vādiyāñ sūrat-e-gulzār mahak uThtī haiñ

ḳhār-zāroñ meñ bhī ham paañv agar rakhte haiñ

hāmil-e-soz ho 'jauhar' na ġhazal kyoñ apnī

ham chhupā.e hue siine meñ sharar rakhte haiñ

hum ki lamhat ke tewar pe nazar rakhte hain

dekh har haal mein jine ka hunar rakhte hain

ghair ki rah pe chalna nahin fitrat apni

hum zamane se juda apni Dagar rakhte hain

jo kaTe haq ke liye raunaq-e-maqtal Thahre

hum sajae hue shanon pe wo sar rakhte hain

be-nishani to muqaddar hai azal se apna

apni pahchan ka ek naqsh magar rakhte hain

hum wahi KHak-nashin hain ki zamin par rah kar

charKH ke chand sitaron pe guzar rakhte hain

hum ko aasaish-e-manzil na sada dena kabhi

wo musafir hain ki pairon mein safar rakhte hain

wadiyan surat-e-gulzar mahak uThti hain

KHar-zaron mein bhi hum panw agar rakhte hain

hamil-e-soz ho 'jauhar' na ghazal kyon apni

hum chhupae hue sine mein sharar rakhte hain