ham-nashin raat hai to raat bhi Dhal jaegi

ham-nashīñ raat hai to raat bhī Dhal jā.egī

sub.h-dam sūrat-e-hālāt badal jā.egī

hiddat-e-shauq salāmat hai to zanjīr-e-jafā

sūrat-e-sham.a kisī roz pighal jā.egī

un kā dam bharte ho to ġham na karo āḳhir-kār

un pe dam dene kī hasrat bhī nikal jā.egī

ham-safīro kabhī miTtī hai tamannā-e-bahār

ye kisī phuul kisī sho.ale meñ Dhal jā.egī

yahī behtar hai ki qurbān-e-vafā ho jaa.e

jaañ agar aaj na jā.egī to kal jā.egī

kis ko ma.alūm thā malbūs-e-sabā meñ sarsar

aa ke gulshan meñ shagūfoñ ko masal jā.egī

ab ke sāvan bhī agar abr na barsā 'aḳhtar'

jo kalī shāḳh pe niklegī vo jal jā.egī

ham-nashin raat hai to raat bhi Dhal jaegi

subh-dam surat-e-haalat badal jaegi

hiddat-e-shauq salamat hai to zanjir-e-jafa

surat-e-shama kisi roz pighal jaegi

un ka dam bharte ho to gham na karo aaKHir-kar

un pe dam dene ki hasrat bhi nikal jaegi

ham-safiro kabhi miTti hai tamanna-e-bahaar

ye kisi phul kisi shoale mein Dhal jaegi

yahi behtar hai ki qurban-e-wafa ho jae

jaan agar aaj na jaegi to kal jaegi

kis ko malum tha malbus-e-saba mein sarsar

aa ke gulshan mein shagufon ko masal jaegi

ab ke sawan bhi agar abr na barsa 'aKHtar'

jo kali shaKH pe niklegi wo jal jaegi