humne ashkon se KHushi ke panw to dhoe bahut

ham ne ashkoñ se ḳhushī ke paañv to dho.e bahut

apnī nādānī pe lekin 'umr bhar ro.e bahut

ham se ruḳhsat ho ga.ī jab zindagī kī har ḳhushī

taan kar chādar ġhamoñ kī chain se so.e bahut

raam jaane kyoñ burā.ī kā rahā khaTkā mujhe

zindagī meñ nekiyoñ ke biij to bo.e bahut

bojh apnā hī vabāl-e-jān ho kar rah gayā

hasratoñ ke bojh yuuñ to 'umr bhar Dho.e bahut

apnī himmat thī ki un se bach bachā kar aa ga.e

varna rāhoñ meñ jahāñ ne ḳhaar to bo.e bahut

kārvāñ le kar chale the zindagī kā saath meñ

rāstoñ meñ ham ne lekin ham-safar kho.e bahut

kar ga.ī had se tajāvuz jab pashemānī kabhī

rakh ke sar dahlīz par un kī 'kañval' ro.e bahut

hum ne ashkon se KHushi ke panw to dhoe bahut

apni nadani pe lekin 'umr bhar roe bahut

hum se ruKHsat ho gai jab zindagi ki har KHushi

tan kar chadar ghamon ki chain se soe bahut

ram jaane kyon burai ka raha khaTka mujhe

zindagi mein nekiyon ke bij to boe bahut

bojh apna hi wabaal-e-jaan ho kar rah gaya

hasraton ke bojh yun to 'umr bhar Dhoe bahut

apni himmat thi ki un se bach bacha kar aa gae

warna rahon mein jahan ne KHar to boe bahut

karwan le kar chale the zindagi ka sath mein

raston mein hum ne lekin ham-safar khoe bahut

kar gai had se tajawuz jab pashemani kabhi

rakh ke sar dahliz par un ki 'kanwal' roe bahut