humne jalte hue KHemon ki wo shaMein rakh din

ham ne jalte hue ḳhemoñ kī vo shāmeñ rakh diiñ

sher meñ lafz rakhe lafz meñ chīḳheñ rakh diiñ

maiñ ne bhī us ko diyā pahlī mulāqāt meñ dil

mere dāman meñ bhī us ne mirī ġhazleñ rakh diiñ

yuuñ lagā aañkh bachāne pe jhapaktī hai palak

usī tasvīr pe maiñ ne bhī nigāheñ rakh diiñ

raushnī ke har ik imkān pe Daalā pardā

ek laḌkī ne mirī soch pe zulfeñ rakh diiñ

phir uThā yaad ke āñgan se udāsī kā dhuāñ

kis ne tāqoñ meñ jalā kar mirī shāmeñ rakh diiñ

ishq itnā thā ki mahfūz kahāñ rakhte ham

aur maañ baap ne baste meñ kitābeñ rakh diiñ

pesh jab karne lage sab tire jalvoñ ko ḳhirāj

ham ne bhī lā ke vahāñ tasht meñ āñkheñ rakh diiñ

hum ne jalte hue KHemon ki wo shamen rakh din

sher mein lafz rakhe lafz mein chiKHen rakh din

main ne bhi us ko diya pahli mulaqat mein dil

mere daman mein bhi us ne meri ghazlen rakh din

yun laga aankh bachane pe jhapakti hai palak

usi taswir pe main ne bhi nigahen rakh din

raushni ke har ek imkan pe Dala parda

ek laDki ne meri soch pe zulfen rakh din

phir uTha yaad ke aangan se udasi ka dhuan

kis ne taqon mein jala kar meri shamen rakh din

ishq itna tha ki mahfuz kahan rakhte hum

aur man bap ne baste mein kitaben rakh din

pesh jab karne lage sab tere jalwon ko KHiraj

hum ne bhi la ke wahan tasht mein aankhen rakh din